અમરેલી, 4 જુલાઈ 2025: અમરેલીની સિવિલ હોસ્પિટલના પરિસરમાં 30 જૂનની મોડી રાત્રે એક શખ્સે કાર ચલાવીને ત્રણ યુવકોને અડફેટે લઈ આતંક મચાવ્યો હતો. આ ઘટનામાં બે યુવકોને ગંભીર ઈજાઓ થઈ હતી. પોલીસે CCTV ફૂટેજના આધારે તપાસ હાથ ધરી આરોપીની ધરપકડ કરી છે.
જાણો શું છે ઘટના
આ ઘટના 30 જૂનની રાત્રે બની હતી, જ્યારે રવિ વેગડા, અજય ચૌહાણ અને હિતેશ ગેલોતર સિવિલ હોસ્પિટલના કેમ્પસમાંથી પસાર થઈને કેન્ટીન તરફ જઈ રહ્યા હતા. આ દરમિયાન જયસુખભાઈ અરજણભાઈ ખેતરિયા નામના શખ્સે પોતાની આઈ-20 કાર (નંબર: GJ-12 DA 2565) બેફામ રીતે ચલાવીને ત્રણેય યુવકોને ટક્કર મારી હતી. ટક્કર એટલી જોરદાર હતી કે ત્રણેય યુવકો ફંગોળાઈને દૂર ફેંકાઈ ગયા હતા. એટલુ જ નહીં, આરોપીએ કાર રિવર્સ લઈ નીચે પડેલા એક યુવક પર ફરીથી ચડાવી દીધી હતી અને પછી ફરાર થઈ ગયો હતો. આ સમગ્ર ઘટના હોસ્પિટલના CCTV કેમેરામાં કેદ થઈ હતી.
આ ઘટનાનું મૂળ કારણ અગાઉ સાવરકુંડલામાં રવિ વેગડા અને ભરત ખેતરિયા વચ્ચે થયેલો ઝઘડો હતો, જેના કારણે ભરતનો ભાઈ જયસુખ ખેતરિયાએ આ ઘટનાને અંજામ આપ્યો હોવાનું સામે આવ્યું છે. અગાઉના ઝઘડાને લઈને સાવરકુંડલા પોલીસ સ્ટેશનમાં ગુનો નોંધાયો હતો, અને ઈજાગ્રસ્ત રવિ વેગડા તથા હિતેશ ખેતરિયા અમરેલી સિવિલ હોસ્પિટલમાં સારવાર માટે દાખલ હતા.
SOGની ટીમે આરોપીને ઝડપ્યો
ઘટનાની જાણ થતાં અમરેલી પોલીસે તાત્કાલિક તપાસ શરૂ કરી અને આરોપીને પકડવા માટે વિશેષ ટીમો રચી. સ્પેશિયલ ઓપરેશન ગ્રૂપ (SOG)ની ટીમે આરોપી જયસુખભાઈ અરજણભાઈ ખેતરિયાને ધારી તાલુકાના મોટી ગરમલી ગામની સીમમાંથી ઝડપી લીધો. આરોપીને અમરેલી સિટી પોલીસ સ્ટેશનમાં સોંપવામાં આવ્યો, જ્યાં તેના પર હત્યાના પ્રયાસનો ગુનો નોંધી કાયદેસર કાર્યવાહી હાથ ધરવામાં આવી.
ગેરકાયદે વીજ કનેક્શનનો પર્દાફાશ
આરોપીની ધરપકડ બાદ પોલીસે તેના ઘરે વીજ વિભાગના અધિકારીઓ સાથે ચેકિંગ હાથ ધર્યું. આ દરમિયાન આરોપીના ઘરે ગેરકાયદે વીજ કનેક્શન ઝડપાયું. PGVCL (પશ્ચિમ ગુજરાત વીજ કંપની લિમિટેડ) દ્વારા આ કનેક્શન કાપી નાખવામાં આવ્યું અને આરોપી સામે 60,000 રૂપિયાથી વધુનો દંડ ફટકારી કાયદેસર કાર્યવાહી કરવામાં આવી.
પોલીસ તપાસ
અમરેલી સિટી પોલીસે આરોપીની પૂછપરછ શરૂ કરી છે, જેમાં ઘટનાના પાછળના ચોક્કસ કારણો અને આરોપીના ઈરાદાને લઈને વધુ માહિતી મેળવવાનો પ્રયાસ ચાલી રહ્યો છે. CCTV ફૂટેજ આ ઘટનાનો મુખ્ય પુરાવો બન્યો છે, જેના આધારે પોલીસ આગળની કાર્યવાહી કરી રહી છે.
આ ઘટનાએ અમરેલીમાં હોસ્પિટલ જેવા સંવેદનશીલ સ્થળે સુરક્ષાના મુદ્દે ચિંતા ઉભી કરી છે. પોલીસે જણાવ્યું છે કે આવી ઘટનાઓને રોકવા માટે કડક પગલાં લેવામાં આવશે.