નવી દિલ્હી: પ્રધાનમંત્રી નરેન્દ્ર મોદીએ એક કાર્યક્રમમાં મોટું એલાન કર્યું. પીએમ મોદીએ કહ્યું કે, આ વર્ષના અંત સુધી બજારમાં પહેલી Made In India સેમિકન્ડક્ટર ચિપ આવી જશે. આ જાહેરાત ભારતના તે વ્યાપક વિઝનનો ભાગ છે જેમાં દેશને માત્ર સેમિકન્ડક્ટર જ નહીં પરંતુ અંતરિક્ષ, 5G-6G અને સ્વચ્છ ઊર્જા જેવા ક્ષેત્રોમાં પણ વૈશ્વિક નેતા બનાવવાનો સમાવેશ થાય છે.
કેમ મહત્વની છે મેડ ઇન ઈન્ડિયા ચિપ
પીએમ મોદીએ કહ્યું કે અગાઉની સરકારો વોટબેંકની રાજનીતિમાં ફસાઈ ગઈ અને ટેક્નોલોજીના અવસરો ગુમાવતી રહી. ‘2014 પછી ભારતે નક્કી કર્યું કે હવે કોઈ બસ મિસ નહીં થશે, પરંતુ આપણે જાતે જ ગાડી ડ્રાઈવ કરીશું.’ સેમિકન્ડક્ટર તેનું સૌથી મોટું ઉદાહરણ છે.
ભારતમાં 50-60 વર્ષ પહેલા ચિપ મેન્યુફેક્ચરિંગ શરૂ થઈ શકતું, પરંતુ ત્યારે તેને અવગણવામાં આવ્યું. હવે મોદી સરકારે સેમિકન્ડક્ટર ઉત્પાદન માટે 65,000 કરોડ રૂપિયાનું કોષ બનાવ્યું છે, જેમાંથી 62,900 કરોડ રૂપિયા પહેલાથી જ ફાળવવામાં આવી ચૂક્યા છે.
ઈલેક્ટ્રોનિક્સ અને આઈટી સચિવ એસ. કૃષ્ણનએ જણાવ્યું કે હવે માત્ર નાની યોજનાઓ માટે થોડી રકમ બચી છે. 76,000 કરોડ રૂપિયાના ભારત સેમિકન્ડક્ટર મિશનમાં ચિપ પ્રોડક્શન સાથે મોહાલીમાં લેબ આધુનિકીકરણ અને ડિઝાઇન ઈનોવેશન પણ સામેલ છે.
ભારતની અર્થવ્યવસ્થા અને ટેકનોલોજીની છલાંગ
પીએમ મોદીએ કહ્યું કે ભારત ખૂબ જલ્દી દુનિયાની ત્રીજી સૌથી મોટી અર્થવ્યવસ્થા બનવા જઈ રહ્યું છે. નિષ્ણાતો માને છે કે આવનારા વર્ષોમાં વૈશ્વિક વૃદ્ધિમાં ભારતનો ફાળો 20 ટકા સુધી રહેશે. આજે ભારતનો રાજકોષીય ઘાટો 4.4 ટકા સુધી ઘટવાની અપેક્ષા છે, બેંકોની સ્થિતિ મજબૂત છે, મોંઘવારી નિયંત્રણમાં છે અને વિદેશી મુદ્રા ભંડાર રેકોર્ડ સ્તરે છે. તેમણે કહ્યું કે 2014 પહેલાં ભારત સ્પેસ અને ટેક મિશનોમાં પાછળ પડેલું હતું. ‘1979 થી 2014 સુધી માત્ર 42 સ્પેસ મિશન થયા, પરંતુ છેલ્લા 11 વર્ષમાં 60 થી વધુ પૂરાં થઈ ગયા.
ગગનયાનથી લઈને ચંદ્ર પર પગ મૂકવાનું સ્વપ્ન
પીએમ મોદીએ જણાવ્યું કે આ વર્ષના અંત સુધી ગગનયાન-1નું અનક્રૂડ મિશન લોન્ચ થશે જેમાં રોબોટ વ્યોમમિત્રાને મોકલવામાં આવશે. 2027માં ભારતનું પહેલું માનવ મિશન અંતરિક્ષમાં જશે. તેના પછી 2028માં ચંદ્રયાન-4, 2035 સુધી ભારતનું અંતરિક્ષ સ્ટેશન અને 2040 સુધી ભારતીય અંતરિક્ષ યાત્રિકની ચંદ્ર પર લેન્ડિંગનું લક્ષ્ય નક્કી છે.
5G થી 6G અને EV એક્સપોર્ટ સુધી
પ્રધાનમંત્રીએ જણાવ્યું કે ભારતે પોતાનો સંપૂર્ણ 5G સ્ટેક જાતે વિકસાવ્યો અને રેકોર્ડ સમયમાં દેશભરમાં લાગુ કર્યો. હવે 6G ટેકનોલોજી પર ઝડપથી કામ થઈ રહ્યું છે. ભારત હવે 100 દેશોને ઇલેક્ટ્રિક વાહનો એક્સપોર્ટ કરવા જઈ રહ્યું છે. ત્યારે, ગયા વર્ષે 4 લાખ કરોડ રૂપિયાના કૃષિ ઉત્પાદનોનો નિકાસ અને 400 કરોડ વેક્સિન ડોઝનું ઉત્પાદન ભારતની આત્મ નિર્ભરતાનો પૂરાવો છે.
રિસર્ચ અને પ્રાઈવેટ સેક્ટરની ભૂમિકા
મોદીએ કહ્યું કે ભારત રિસર્ચ પર પણ ભાર મૂકી રહ્યું છે. 50 હજાર કરોડ રૂપિયાની નેશનલ રિસર્ચ ફાઉન્ડેશન અને 1 લાખ કરોડ રૂપિયાની રિસર્ચ ડેવલપમેન્ટ ફંડ સ્કીમ તેના ઉદાહરણ છે. આજે દેશમાં 300 થી વધુ સ્પેસ સ્ટાર્ટઅપ કાર્યરત છે, જ્યારે 2014માં માત્ર એક જ હતું. સરકારે આ વર્ષના બજેટમાં અંતરિક્ષ સ્ટાર્ટઅપ્સ માટે 1,000 કરોડ રૂપિયાનો વેન્ચર કેપિટલ ફંડ પણ બનાવ્યું છે.
