અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે તેઓ રશિયા પર કડક પ્રતિબંધ મૂકવા માટે તૈયાર છે, પરંતુ તેની શરત એ છે કે બધા નાટો દેશો સંપૂર્ણ રીતે રશિયન તેલ ખરીદવાનું બંધ કરે અને પોતાના સ્તરે પણ પ્રતિબંધ લાગુ કરે. ટ્રમ્પે નાટોના બધા દેશોને એક પત્ર લખ્યો છે. તેમાં તેમણે યુક્રેન યુદ્ધની પૃષ્ઠભૂમિમાં રશિયા અને ચીન સામે સામૂહિક કાર્યવાહી કરવાની અપીલ કરી છે.
‘રશિયાથી તેલ ખરીદી બંધ કરો નાટો દેશો’
ટ્રમ્પે પત્રમાં કહ્યું કે તેઓ રશિયા પર ‘મોટા પ્રતિબંધ’ મૂકવા માટે તૈયાર છે, પરંતુ ત્યારે જ જ્યારે બધા નાટો દેશો સહમત થાય અને રશિયાથી તેલ ખરીદવાનું સંપૂર્ણ રીતે બંધ કરે. આ માહિતી ટ્રમ્પે પોતાના સોશિયલ મીડિયા પ્લેટફોર્મ ટ્રુથ સોશિયલ પર આપી. તેમણે લખ્યું, ‘નાટોની જીત માટે પ્રતિબદ્ધતા અત્યાર સુધી 100% કરતાં ઘણી ઓછી રહી છે. સાથે જ, કેટલાક દેશો દ્વારા રશિયન તેલની ખરીદી ચોંકાવનારી છે! આથી રશિયા સાથે તમારી વાટાઘાટની સ્થિતિ અને સોદાકીય શક્તિ નબળી પડે છે. ખેર, હું પ્રતિબંધ મૂકવા તૈયાર છું, જ્યારે તમે તૈયાર હોવ. ફક્ત કહો ક્યારે?’
ચીન પર પણ 100% ટેરિફનો સૂચન
ટ્રમ્પે આગળ પ્રસ્તાવ મૂક્યો કે એક જૂથ તરીકે નાટોએ ચીન પર ‘50%થી 100% સુધી ટેરિફ’ લગાવવો જોઈએ, જ્યાં સુધી રશિયા-યુક્રેન યુદ્ધ પૂરૂં ન થાય. તેમનું કહેવું હતું કે આવા પગલાથી ચીનનો રશિયા પરનો ‘મજબૂત પકડ’ તૂટશે.
તેમણે લખ્યું, ‘મને વિશ્વાસ છે કે જો ચીન પર નાટો દેશો ટેરિફ લગાવે, તો રશિયા અને યુક્રેન વચ્ચેના ખતરનાક અને મૂર્ખામીભર્યા યુદ્ધને પૂરો કરવામાં મોટી મદદ મળશે. ચીન પરના પ્રતિબંધને યુદ્ધ પૂરૂં થયા પછી દૂર કરી દેવામાં આવશે.’
બાઈડેન પ્રશાસન પર કટાક્ષ
ટ્રમ્પે આ દરમિયાન બાઈડેન પ્રશાસન પર કટાક્ષ કર્યો. તેમણે કહ્યું, ‘આ ટ્રમ્પનું યુદ્ધ નથી (જો હું રાષ્ટ્રપતિ હોત તો આ ક્યારેય શરૂ જ ન થયું હોત!), આ બાઈડેન અને ઝેલેન્સ્કીનું યુદ્ધ છે. હું ફક્ત તેને રોકવા અને હજારો રશિયન અને યુક્રેનિયન જીવ બચાવવા માટે છું.’ પત્રના અંતે ટ્રમ્પે લખ્યું કે જો આ પગલાં લેવામાં આવે તો યુદ્ધ જલદી પૂરૂં થશે અને જિંદગીઓ બચશે. તેમણે કહ્યું, ‘જો નહીં, તો તમે ફક્ત મારો સમય અને અમેરિકાનો સમય, ઊર્જા અને પૈસા બરબાદ કરી રહ્યા છો.’
